Garvita Odia
ଦେବଗଡ଼:ଗତ ଜୁନ ମାସ ୨୧ ତାରିଖ ଦିନ ରାତିରେ ଦେବଗଡ଼ ଜିଲ୍ଲାର ବାରକୋଟ ଥାନାର ସିଂହଶାଳ ପଞ୍ଚାୟତର ଚଟିଆପାଲି ବାଲିଘାଟରୁ ଶ୍ରମିକ ଇନ୍ଦ୍ର ମୁଣ୍ଡାଙ୍କର ଗଳିତ ମୃତଦେହ ଉଦ୍ଧାର କରିଥିଲା ପୁଲିସ। ଏନେଇ ପୁଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା। ଏସପି କିଶୋର ଚନ୍ଦ୍ର ମୁଣ୍ଡଙ୍କ ନିର୍ଦ୍ଦେଶ କ୍ରମେ ବାରକୋଟ ଥାନା ପୁଲିସ ଅଭିଯୁକ୍ତକୁ ଗିରଫ କରିବା ପାଇଁ ବିଭିନ୍ନ ସ୍ଥାନରେ ଚଢଉ ଜାରି ରଖିଥିଲା।ତେବେ ଆଜି ପୁଲିସ ଅଭିଯୁକ୍ତକୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ ବାରକୋଟ ଥାନାର ବାହାଡାପଶି ଗ୍ରାମର ପିତାମ୍ବର ପାତ୍ର(୩୩)। ପୁଲିସ ଆଜି ଅଭିଯୁକ୍ତକୁ କୋର୍ଟ ଚାଲାଣ କରିଥିବାବେଳେ ଜାମିନ ନାମାଞ୍ଜୁର ହେବାରୁ ତାକୁ ଜେଲ ହାଜତକୁ ପଠାଇ ଦିଆଯାଇଛି। ସୂଚନା ଅନୁଯାୟୀ, ଗତ ଜୁନ ମାସ ୧୯ ତାରିଖରେ ସିଂହଶାଳ ଗାଁର ଇନ୍ଦ୍ର ଚଟିଆବାଲି ବାଲି ଘାଟକୁ କାମ କରିବାକୁ ଯାଇଥିଲେ। କିନ୍ତୁ ଇନ୍ଦ୍ର ଘରକୁ ଫେରିନଥିବା ତାଙ୍କ ସ୍ତ୍ରୀ ବାରକୋଟ ଥାନାରେ ଅଭିଯୋଗ କରିଥିଲେ। ତେବେ ଏହାର କିଛି ଦିନ ପରେ ଇନ୍ଦ୍ରଙ୍କ ମୃତ ଦେହ ପୁଲିସ ବାଲିଘାଟ ଉଦ୍ଧାର କରିଥିଲା।ହତ୍ୟାଘଟଣାରେ ସମ୍ପୃକ୍ତ ବାଲିଘାଟ ଠିକାଦାର,ପ୍ରୋକୋଲିନ୍ ଅପରେଟର,ହାଇଓ୍ବା ଚାଳକ ଓ ଅନ୍ୟମାନଙ୍କୁ ଗିରଫ ଦାବିରେ ସମ୍ପୃକ୍ତ ଅଞ୍ଚଳବାସୀ ଉକ୍ତ ବାଲିଘାଟ ନିକଟସ୍ଥ ବାହାଡ଼ାପୋଶି-ରାଉରକେଲା ୧୦ ନମ୍ବର ରାଜ୍ୟ ରାଜପଥ ଅବରୋଧ କରିଥିଲେ। ପରେ ଜିଲ୍ଲାପ୍ରଶାସନ ଓ ପୁଲିସ ଅଞ୍ଚଳବାସୀକୁ ବୁଝାସୁଝା କରିବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା। ବାରକୋଟ ଥାନା ପୁଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା। ଆଜି ଅଭିଯୁକ୍ତ ହାଇୱା ଚାଳକକୁ ପୁଲିସ ଗିରଫ କରି କୋର୍ଟ ଚାଲାଣ କରିଛି।
