ସାପକାମୁଡ଼ାରେ ପୁଅ ମୃତ, ବାପା ଗୁରୁତର

ଦେବଗଡ଼: ସାପକାମୁଡ଼ାରେ ଦେବଗଡ଼ ଜିଲ୍ଲା ତିଲେଇବଣି ବ୍ଲକ୍‌ ଝରାଗୋଗୁଆ ପଞ୍ଚାୟତ ତିଳେଇମାଳ ଗାଁରେ ପୁଅର ମୃତ୍ୟୁ ଘଟିଥିବା ବେଳେ ବାପା ଗୁରୁତର ଅସୁସ୍ଥ ହୋଇ ପଡ଼ିଛନ୍ତି। ସୂଚନା ଅନୁସାରେ, ତିଳେଇମାଳର ରାମଚନ୍ଦ୍ର କିଷାନଙ୍କ ପରିବାର ଲୋକେ ରବିବାର ରାତିରେ ଖାଇପିଇ ବାରଣ୍ଡାରେ ଶୋଇଥିଲେ। ସୋମବାର ସକାଳେ ରାମଚନ୍ଦ୍ର ତାଙ୍କ ପୁଅ ନୀତେଶ (୨ ମାସ)କୁ ଉଠାଇବାକୁ ଯାଇଥିଲେ। ହେଲେ ଶିଶୁଟି ଚେତାଶୂନ୍ୟ ଥିଲା। ସେ ଘୋଡ଼େଇ ହୋଇଥିବା ଚାଦରକୁ ରାମଚନ୍ଦ୍ର କାଢ଼ି ଦେବାରୁ ଭିତରେ ଥିବା ଏକ ବିଷଧର ସାପ ରାମଚନ୍ଦ୍ରଙ୍କୁ ଚୋଟ ମାରିଥିଲା। ପରିବାର ଲୋକେ ଉଭୟଙ୍କୁ ଚିକିତ୍ସା ପାଇଁ ଡାକ୍ତରଖାନା ନନେଇ ଝଡ଼ାଫୁଙ୍କା କରାଇଥିଲେ। ରାମଚନ୍ଦ୍ରଙ୍କ ସ୍ବାସ୍ଥ୍ୟାବସ୍ଥା ମଧ୍ୟ ଗୁରୁତର ହେବାରୁ ଗାଁର କିଛି ଯୁବକ ତାଙ୍କୁ ବୁଝାସୁଝା କରି ଚିକିତ୍ସା ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ସେତେବେଳକୁ ଶିଶୁଟିର ମୃତ୍ୟୁ ହୋଇ ସାରିଥିଲା। ଖବର ପାଇ ଲଇମୁରା ପୁଲିସ ଘଟଣାସ୍ଥଳରେ ପହଞ୍ଚି ଶବ ଜବତ କରିବା ସହ ଏକ ମାମଲା ରୁଜୁକରି ତଦନ୍ତ ଆରମ୍ଭ କରିଛି।