Garvita Odia
କଟକ: ବିଭିନ୍ନ ସମସ୍ୟା ପାଇଁ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠକୁ ଯାଇ ଫେରାଦ୍ ହେଉଛନ୍ତି ସାଧାରଣ ଲୋକେ । କାର୍ୟ୍ୟାନୁଷ୍ଠାନ ପାଇଁ ପିଟିସନ୍ ଦେଉଛନ୍ତି । ଅଭିଯୋଗ ଆଧାରରେ ଆବଶ୍ୟକ ପଦକ୍ଷେପ ନେବାକୁ ଜିଲ୍ଲାସ୍ତରୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଉଛି । କିନ୍ତୁ ନିର୍ଦ୍ଦେଶ ଅନୁସାରେ ପଦକ୍ଷେପ ନିଆଯାଉନାହିଁ । ଅଭିଯୋଗ ପ୍ରକୋଷ୍ଠରେ ଦାଖଲ ପିଟିସନ୍କୁ ଅଣଦେଖା କରିବା ଏବେ କଟକ ଜିଲ୍ଲା ପ୍ରଶାସନ ଅଧୀନରେ କାର୍ୟ୍ୟରତ ସରକାରୀ ବାବୁଙ୍କୁ ମହଙ୍ଗା ପଡ଼ିଛି । ନିର୍ଦ୍ଦେଶ ଆଧାରରେ ପଦକ୍ଷେପ ନେଇନଥିବାରୁ କଟକ ଜିଲ୍ଲାର ୪୮ ଜଣ ସରକାରୀ ଅଫିସରଙ୍କ ଦରମା ବନ୍ଦ କରାଯାଇଛି । କେବଳ ସରକାରୀ ଅଧିକାରୀ ନୁହନ୍ତି, ସେମାନଙ୍କ ଅଧୀନରେ କାମ କରୁଥିବା ପ୍ରାୟ ୧୫ ଶହ କର୍ମଚାରୀ ବି ଫେବ୍ରୁଆରୀ ମାସର ଦରମା ଉଠାଇ ପାରିନାହାନ୍ତି । ଅଧିକାରୀ ଓ କର୍ମଚାରୀଙ୍କ ଦରମା ବନ୍ଦ କରିବା ପାଇଁ ଜିଲ୍ଲାର ଟ୍ରେଜେରୀ ଅଫିସର ଓ ସମସ୍ତ ସବ୍-ଟ୍ରେଜେରୀ ଅଫିସରଙ୍କୁ ଚିଠି ଲେଖି ନିର୍ଦ୍ଦେଶ ଦେଇଛନ୍ତି ଅତିରିକ୍ତ ଜିଲ୍ଲାପାଳ ଶିବ ଟପୋ ।
ଦରମା ବନ୍ଦ ଥିବା ଅଫିସରଙ୍କ ତାଲିକାରେ ରହିଛନ୍ତି ୧୦ ବିଡିଓ, ୬ ତହସିଲଦାର, କଟକ ସିଡିଏମ୍ଓ, ବାଙ୍କୀ ଉପଜିଲ୍ଲାପାଳ ପ୍ରମୁଖ । ଏହାସହ ଡିସିପିଓ, ଓମ୍ଫେଡ୍ ଏମ୍ଡି, ଇଡ୍କୋ ଜିଏମ୍ଙ୍କ ସମେତ ବହୁ ଅଧିକାରୀ ଓ ତାଙ୍କ କାର୍ୟ୍ୟାଳୟର କର୍ମଚାରୀ ବି ଅଛନ୍ତି । ନିର୍ଦ୍ଦେଶ ଦିଆଯିବାର କିଛି ଘଣ୍ଟା ଭିତରେ କିଛି ଅଧିକାରୀଙ୍କ କାର୍ୟ୍ୟାଳୟ ତରଫରୁ ତରବରିଆ ଢଙ୍ଗରେ ବାକି ଥିବା କାମ ତୁଟାଇ ଦିଆଯାଇଛି । ଯାହାଫଳରେ ପ୍ରାୟ ୧୫ ଅଧିକାରୀ ଓ ତାଙ୍କ କାର୍ୟ୍ୟାଳୟର କିଛି କର୍ମଚାରୀଙ୍କୁ ଦରମା ବିଳମ୍ବରେ ପ୍ରଦାନ କରାଯାଇଛି । ଆହୁରି ୩୦ରୁ ଅଧିକ ଅଧିକାରୀ ଓ ଅନେକ କର୍ମଚାରୀଙ୍କ ଦରମା ଏବେ ସୁଦ୍ଧା ବନ୍ଦ ରହିଛି ।
