ପେନସନ, ବକେୟା ପ୍ରାପ୍ୟ ଓ ଅବସରକାଳୀନ ସୁବିଧା ନାମରେ ଠକେଇ

ଦେବଗଡ଼:ପେନସନ ଓ ଅବସରକାଳୀନ ସୁବିଧା ସୁଯୋଗ ଯୋଗାଇଦେବାର ପ୍ରତିଶୃତି ଦେଇ ଅବସରପ୍ରାପ୍ତ କର୍ମଚାରୀଙ୍କ ଠାରୁ ଅନୁଗୁଳ ଜିଲ୍ଲାର ଜଣେ ବ୍ୟକ୍ତି ଠକେଇ କରି ଅର୍ଥ ସଂଗ୍ରହ କରିଥିବା ବାରକୋଟ ଥାନାରେ ଅଭିଯୋଗ ହୋଇଛି। ଅଭିଯୋଗ ପାଇବା ପରେ ପୁଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ଅଭିଯୋଗ ଅନୁଯାୟୀ, ଅନୁଗୁଳ ଜିଲ୍ଲା ରେଙ୍ଗାଳି ନଦୀବନ୍ଧ ପ୍ରକଳ୍ପ କପିଳେଶ୍ୱର ଶିବ ମନ୍ଦିର ଅଞ୍ଚଳର ଗୋବିନ୍ଦ ଚନ୍ଦ୍ର ନାୟକ ନାମକ ଜଣେ ବ୍ୟକ୍ତି ଦେବଗଡ ଜିଲ୍ଲା ବାରକୋଟ ଥାନାଂଚଳ ଝରବାହାଳ ଗ୍ରାମର ଅବସରପ୍ରାପ୍ତ ସରକାରୀ କର୍ମଚାରୀ ସୁଶୀଳ ବେହେରା(୭୨)ଙ୍କୁ ଅଦାଲତ ଆଦେଶ ଜରିଆରେ ସରକାରଙ୍କ ଠାରୁ ପେନସନ ଓ ବକେୟା ପାଉଣା ସମେତ ସମସ୍ତ ପ୍ରକାର ଅବସରକାଳୀନ ସୁବିଧା ସୁଯୋଗ ଯୋଗାଇଦେବାକୁ ପ୍ରତିଶୃତି ଦେଇଥିଲେ।ସୁଶୀଳ ଏହି ପ୍ରତିଶୃତିକୁ ବିଶ୍ୱାସ କରି ଅନ୍ୟ କେତେକ ଅବସରପ୍ରାପ୍ତ କର୍ମଚାରୀଙ୍କୁ ବାରକୋଟ ଥାନାଂଚଳର ବମ୍ପରଡା ଗ୍ରାମରେ ଏକାଠି କରିଥିଲେ। ଏହାସହିତ ଗୋବିନ୍ଦ ପେନସନ ଓ ବକେୟା ପାଉଣା ସମେତ ସମସ୍ତ ପ୍ରକାର ଅବସରକାଳୀନ ସୁବିଧା ସୁଯୋଗ ଯୋଗାଇଦେବା ବିଷୟରେ ବୁଝାଇଥିଲା।ଅବସରପ୍ରାପ୍ତ କର୍ମଚାରୀ ମାନେ ଗୋବିନ୍ଦର କଥାକୁ ବିଶ୍ୱାସ କରିବା ପରେ ଏଥି ନିମନ୍ତେ ସେମାନଙ୍କ ନିକଟରୁ ଅର୍ଥ ଆଦାୟ କରିଥିଲା। ବହୁ ଦିନ ବିତିଗଲା ପରେ ଗୋବିନ୍ଦକୁ ଟଙ୍କା ଦେଇଥିବା ଅବସରପ୍ରାପ୍ତ କର୍ମଚାରୀ ମାନେ ନିରାଶ ହୋଇପଡିବା ସହ ଦେଇଥିବା ଟଙ୍କା ଫେରସ୍ତ ମାଗିବାରୁ ଗୋବିନ୍ଦ ସେମାନଙ୍କୁ ଟଙ୍କା ଫେରସ୍ତ କରିବା ପରିବର୍ତ୍ତେ ସେମାନଙ୍କୁ ଅଶ୍ରାବ୍ୟ ଭଷାରେ ଗାଳିଗୁଲଜ କରିଥିଲା।ଫଳରେ ସୁଶୀଳ ବାଧ୍ୟ ହୋଇ ଏନେଇ ବାରକୋଟ ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ଅଧାରରେ ପୁଲିସ ମାମଲା ଋଜୁକରି ଘଟଣାର ତଦନ୍ତର ଆରମ୍ଭ କରିଛି।