ଜୁନ୍‌ ୧୫ ପରେ ମୋଦି ମନ୍ତ୍ରୀମଣ୍ଡଳ ସମ୍ପ୍ରସାରଣ

ଭୁବନେଶ୍ୱର : ବିଜେପିରେ ଖୁବ୍‌ଶୀଘ୍ର ବଡ଼ଧରଣର ଅଦଳବଦଳ ହେବ । ମୋଦିଙ୍କ ମନ୍ତ୍ରୀମଣ୍ଡଳର ସମ୍ପ୍ରସାରଣ ହେବା ସହ ନିତିନ ନବୀନଙ୍କ ନୂଆ ଟିମ୍‌ ବି ଗଢ଼ା ହେବ । ଏନେଇ ବିଜେପି ଓ ଆରଏସଏସରେ ମାନସମନ୍ଥନ ଆରମ୍ଭ ହୋଇଯାଇଛି । ଜୁନ୍‌ ୧୫ରେ ମଳ ମାସ ସରିବା ପରେ ବିଜେପି ଗୁରୁତ୍ୱପୂର୍ଣ୍ଣ଼ ନିଷ୍ପତ୍ତି ନେବ ବୋଲି ଜାତୀୟ ଗଣମାଧ୍ୟମରେ ଜୋରଦାର ଚର୍ଚ୍ଚା ଆରମ୍ଭ ହୋଇଯାଇଛି ।
ଦଳ ପକ୍ଷରୁ ମନ୍ତ୍ରୀମଣ୍ଡଳ ଅଦଳବଦଳ, ସଂଗଠନରେ ଅଦଳବଦଳ ଆଦିକୁ ନେଇ ଉଚ୍ଚସ୍ତରୀୟ ଆଲୋଚନା ଜାରିରହିଛି । ବିଭିନ୍ନ ରାଜ୍ୟର ନେତାଙ୍କୁ ଡକାଯାଇ ଦିଲ୍ଲୀରେ ଆଲୋଚନା କରାଯାଉଛି । ନିକଟରେ ଉତ୍ତରପ୍ରଦେଶ, ତେଲେଙ୍ଗାନା ଓ ଆସାମର ନେତାମାନେ ଦଳୀୟ ମୁଖ୍ୟାଳୟକୁ ଯାଇ ଆଲୋଚନା କରିଛନ୍ତି । ବିଜେପିର ଜାତୀୟ ସାଧାରଣ ସମ୍ପାଦକ ବିନୋଦ ତାୱଡେ଼ଙ୍କ ଉପସ୍ଥିତିରେ ସେମାନେ ଆଲୋଚନା କରିଥିଲେ । ନିୟମିତ ବ୍ୟବଧାନରେ ବିଭିନ୍ନ ରାଜ୍ୟ ଟିମ୍‌ ସହ ବି ଆଲୋଚନା ହେବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପାଞ୍ଚଦିନିଆ ବିଦେଶ ଗସ୍ତ ସାରି ଭାରତକୁ ଫେରି ଆସିଛନ୍ତି । ମୋଦିଙ୍କ ସହ ମଧ୍ୟ ବରିଷ୍ଠ ନେତାମାନେ ଏନେଇ ଆଲୋଚନା କରିବାର କାର୍ଯ୍ୟସୂଚୀ ରହିଛି ।
ଏତଦ୍‌ବ୍ୟତୀତ ଦିଲ୍ଲୀ, ହରିୟାଣା, ତ୍ରିପୁରା, ପଞ୍ଜାବ ଓ କର୍ଣ୍ଣାଟକ ଭଳି ରାଜ୍ୟରେ ରାଜ୍ୟ ସଭାପତି ଚୟନ କରାଯିବା ସହ ନବୀନଙ୍କ ନୂଆ ଜାତୀୟ ଟିମ୍‌ ଗଠନ ନେଇ ପ୍ରକ୍ରିୟା ଆରମ୍ଭ ହୋଇଯାଇଛି । ସେହିପରି ଚଳିତ ବର୍ଷ କେତେକ ରାଜ୍ୟରେ ରାଜ୍ୟସଭା ନିର୍ବାଚନ ହେବ । ଜୁନରୁ ନଭେମ୍ବର ମଧ୍ୟରେ ନିର୍ବାଚନ ହେବାର ଥିବାରୁ ସାଂଗଠନିକ ଦକ୍ଷତା ଥିବା ନେତାଙ୍କୁ ସୁଯୋଗ ମିଳିବ ବୋଲି ଜାଣିବାକୁ ମିଳିଛି । ଆନ୍ଧ୍ରପ୍ରଦେଶରେ ୪, କର୍ଣ୍ଣାଟକରେ ୪, ଗୁଜୁରାଟରେ ୪, ମଧ୍ୟପ୍ରଦେଶରେ ୩, ରାଜସ୍ଥାନରେ ୩, ମେଘାଳୟରେ ୧, ମଣିପୁରରେ ୧, ଝାରଖଣ୍ଡରେ ୧, ଅରୁଣାଚଳପ୍ରଦେଶରେ ୧, ମିଜୋରାମରେ ୧, ଉତ୍ତରପ୍ରଦେଶରେ ୧୦ ଓ ଉତ୍ତରାଖଣ୍ଡରେ ୧ ରାଜ୍ୟସଭା ଆସନ ପାଇଁ ନିର୍ବାଚନ ହେବ । ଏନେଇ ବିଭିନ୍ନ ରାଜ୍ୟରୁ ମଧ୍ୟ ସମ୍ଭାବ୍ୟ ତାଲିକା ମଗାଯାଇଛି । ରାଜ୍ୟ ନିର୍ବାଚନ କମିଟି ଏସଂକ୍ରାନ୍ତରେ କେନ୍ଦ୍ରୀୟ ନିର୍ବାଚନ କମିଟିକୁ ତାଲିକା ପ୍ରଦାନ କରିବ । ତାମିଲନାଡୁର ବିଜେପି ନେତାଙ୍କୁ ଆନ୍ଧ୍ରପ୍ରଦେଶ ଓ କର୍ଣ୍ଣାଟକରୁ ରାଜ୍ୟସଭାକୁ ପଠାଯିବ । ସେହିପରି ବିଜେପିର ପୂର୍ବତନ ମୁଖ୍ୟମନ୍ତ୍ରୀ ଓ କିଛି ବରିଷ୍ଠ ନେତାଙ୍କୁ ନିଜ ରାଜ୍ୟ କିମ୍ବା ଅନ୍ୟ ରାଜ୍ୟରୁ ରାଜ୍ୟସଭାକୁ ପଠାଇବା ପାଇଁ ଯୋଜନା କରାଯାଇଛି ।