PUC ନାହିଁ ତ ତେଲ ନାହିଁ

ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ପ୍ରଦୂଷଣ ସମସ୍ୟାକୁ ନିୟନ୍ତ୍ରଣ କରିବା ପାଇଁ ସରକାର ଏକ ବଡ଼ ଏବଂ କଠୋର ନିଷ୍ପତ୍ତି ଗ୍ରହଣ କରିଛନ୍ତି । ଏଣିକି ଦିଲ୍ଲୀ ରାଜପଥରେ ଗାଡ଼ି ଚଲାଇବା ପୂର୍ବରୁ ଆପଣଙ୍କୁ ନିଜ ଗାଡ଼ିର ‘ହେଲ୍‌ଥ ରିପୋର୍ଟ’ ବା PUC ସାଥିରେ ରଖିବାକୁ ହେବ । ଯଦି ଆପଣଙ୍କ ପାଖରେ ବୈଧ ପ୍ରଦୂଷଣ ପ୍ରମାଣପତ୍ର ନାହିଁ, ତେବେ ପେଟ୍ରୋଲ ପମ୍ପରେ ଆପଣଙ୍କୁ ନିରାଶ ହେବାକୁ ପଡ଼ିବ । ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କ ନିର୍ଦ୍ଦେଶକ୍ରମେ ସମଗ୍ର ଦିଲ୍ଲୀରେ ‘No PUC, No Fuel’ ନିୟମକୁ ଅତି କଠୋର ଭାବେ ଲାଗୁ କରାଯାଇଛି ।

ନୂଆ ନିୟମ ଅନୁଯାୟୀ, ଦିଲ୍ଲୀର କୌଣସି ବି ପେଟ୍ରୋଲ ପମ୍ପ ବା ଗ୍ୟାସ୍ ଷ୍ଟେସନରେ ପେଟ୍ରୋଲ, ଡିଜେଲ, ସିଏନଜି କିମ୍ବା ଏଲପିଜି ନେବା ପାଇଁ ବୈଧ PUC ସାର୍ଟିଫିକେଟ୍ ଦେଖାଇବା ଅନିର୍ବାର୍ଯ୍ୟ । ଯଦି ଗାଡ଼ି ଚାଳକଙ୍କ ପାଖରେ ଏହି ପ୍ରମାଣପତ୍ର ନଥିବ, ତେବେ ସେମାନଙ୍କୁ କୌଣସି ବି ପରିସ୍ଥିତିରେ ଇନ୍ଧନ ଯୋଗାଇ ଦିଆଯିବ ନାହିଁ । ପ୍ରଦୂଷଣ ବଢ଼ାଉଥିବା ଗାଡ଼ିଗୁଡ଼ିକ ଉପରେ ଅଙ୍କୁଶ ଲଗାଇବା ପାଇଁ ସରକାର ଏହି ‘ଜିରୋ ଟଲରାନ୍ସ’ ନୀତି ଆପଣାଇଛନ୍ତି । ବୁଧବାର ଦିନ ଏକ ଗୁରୁତ୍ୱପୂର୍ଣ୍ଣ ବୈଠକରେ ମୁଖ୍ୟମନ୍ତ୍ରୀ ରେଖା ଗୁପ୍ତା ଅଧିକାରୀମାନଙ୍କୁ ସ୍ପଷ୍ଟ କରିଛନ୍ତି ଯେ, ବାୟୁ ଗୁଣବତ୍ତା ସୁଧାରିବା ପାଇଁ ଏହି ପଦକ୍ଷେପ ଅତ୍ୟନ୍ତ ଜରୁରୀ । ସେ କହିଛନ୍ତି, “ବାୟୁ ପ୍ରଦୂଷଣ ଏକ ବଡ଼ ଆହ୍ୱାନ ଏବଂ ଏହାର ମୁକାବିଲା ପାଇଁ କଠୋର ପଦକ୍ଷେପ ନେବା ସମୟର ଆହ୍ୱାନ । ଏଣିକି ଦିଲ୍ଲୀର କୌଣସି ବି ଇନ୍ଧନ କେନ୍ଦ୍ରରେ ବିନା PUC ସାର୍ଟିଫିକେଟରେ ତେଲ ମିଳିବ ନାହିଁ । ନିୟମ ଖିଲାଫ କଲେ ଗାଡ଼ି ଜବତ ସହ ମୋଟା ଅଙ୍କର ଜୋରିମାନା କରାଯିବ ।”
ଏହି ନିୟମ ଲାଗୁ ହେବା ପରେ ଦିଲ୍ଲୀର ବିଭିନ୍ନ ପେଟ୍ରୋଲ ପମ୍ପରେ ଗାଡ଼ିଗୁଡ଼ିକର ଲମ୍ବା ଧାଡ଼ି ଦେଖିବାକୁ ମିଳିଛି । ଯାଞ୍ଚ ପ୍ରକ୍ରିୟା ଯୋଗୁଁ କିଛି ସ୍ଥାନରେ ଟ୍ରାଫିକ ସମସ୍ୟା ଉପୁଜୁଥିଲେ ମଧ୍ୟ ସରକାର ପରିସ୍ଥିତି ଉପରେ ନଜର ରଖିଛନ୍ତି । ଏହି ନିୟମକୁ ସଫଳ କରିବା ପାଇଁ ପରିବହନ ବିଭାଗ, ଖାଦ୍ୟ ଓ ଯୋଗାଣ ବିଭାଗ, ଦିଲ୍ଲୀ ମୁନିସିପାଲ କର୍ପୋରେସନ, ଦିଲ୍ଲୀ ଟ୍ରାଫିକ ପୁଲିସ ବିଭାଗଗୁଡ଼ିକୁ ସତର୍କ ରହିବାକୁ କୁହାଯାଇଛି । ଅଧିକାରୀମାନଙ୍କୁ ଚେତାବନୀ ଦିଆଯାଇଛି ଯେ, ଯଦି କୌଣସି ପେଟ୍ରୋଲ ପମ୍ପ ନିୟମ ଉଲ୍ଲଂଘନ କରି ଇନ୍ଧନ ଯୋଗାଏ, ତେବେ ସମ୍ପୃକ୍ତ ପମ୍ପ ବିରୋଧରେ ମଧ୍ୟ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସରକାରଙ୍କ ପକ୍ଷରୁ ଦିଲ୍ଲୀବାସୀଙ୍କୁ ନିବେଦନ କରାଯାଇଛି ଯେ, ସେମାନେ ନିଜ ନିଜ ଗାଡ଼ିର ପ୍ରଦୂଷଣ ଯାଞ୍ଚ କରି PUC ସାର୍ଟିଫିକେଟ୍ ଅପଡେଟ୍ ରଖନ୍ତୁ । ଏହା କେବଳ ଏକ ନିୟମ ନୁହେଁ, ବରଂ ସ୍ୱଚ୍ଛ ଓ ସୁସ୍ଥ ଦିଲ୍ଲୀ ଗଠନ ପାଇଁ ଏକ ସାମୂହିକ ଦାୟିତ୍ୱ ବୋଲି ମୁଖ୍ୟମନ୍ତ୍ରୀ ପ୍ରକାଶ କରିଛନ୍ତି ।