ବଙ୍ଗୋପସାଗରରେ ପୁଣି ଲଘୁଚାପ ଦାନା ବାନ୍ଧିବା ନେଇ ଆକଳନ

ଭୁବନେଶ୍ୱର: ବଙ୍ଗୋପସାଗରରେ ପୁଣି ଲଘୁଚାପ ଦାନା ବାନ୍ଧିବା ନେଇ ଆକଳନ କରାଯାଉଛି । ବିଭିନ୍ନ ମଡେଲ୍‌ର ଆକଳନକୁ ନେଇ ଭାରତୀୟ ପାଣିପାଗ ବିଜ୍ଞାନ ବିଭାଗ ବିସ୍ତାରିତ ୭ରୁ ହାଲୁକା ଶୀତ ପୂର୍ବାନୁମାନରେ ସୂଚାଇଛି, ସମ୍ଭବତଃ ୧୧ ତାରିଖବେଳକୁ ଦକ୍ଷିଣ ପୂର୍ବ ବଙ୍ଗୋପସାଗର ଓ ସଂଲଗ୍ନ ଆଣ୍ଡାମାନ ସାଗରରେ ଏକ ଘୂର୍ଣ୍ଣିବଳୟ ସୃଷ୍ଟି ହୋଇପାରେ। ଏହା ଘନୀଭୂତ ହୋଇ ୧୩ରେ ଲଘୁଚାପ ରୂପ ନେଇପାରେ ଦକ୍ଷିଣ ପୂର୍ବ ବଙ୍ଗୋପସାଗରରେ । ସ୍ୱଳ୍ପ ସମ୍ଭାବନା ରହିଛି ଯେ ଏହା ୧୫ ତାରିଖବେଳକୁ ଏକ ଅବପାତରେ ପରିଣତ ହୋଇପାରେ ଦକ୍ଷିଣ ପଶ୍ଚିମ ବଙ୍ଗୋପସାଗରରେ ।
ଏହାର ଗତିପଥ, ତୀବ୍ରତା ନେଇ ଏବେଠାରୁ ସ୍ପଷ୍ଟ ଆକଳନ ସହଜ ନୁହେଁ । ବିଶେଷଜ୍ଞଙ୍କ ମତରେ ସାଧାରଣତଃ ନଭେମ୍ବର ମାସରେ ସୃଷ୍ଟି ହେଉଥିବା ଅବପାତ କିମ୍ବା ବାତ୍ୟା ଓଡ଼ିଶା ଉପକୂଳ ଆଡ଼କୁ ଆସିବା ସମ୍ଭାବନା କମ୍‌ ରହିଥାଏ । ଅଧିକାଂଶ ସମୟରେ ଏହାର ଗତି ତାମିଲନାଡ଼ୁ କିମ୍ବା ଆନ୍ଧ୍ର ଉପକୂଳ ଥାଏ । ବର୍ତ୍ତମାନ ପର୍ଯ୍ୟନ୍ତ ଯେତିକି ଆକଳନ କରାଯାଇଛି, ସେଥିରେ ଓଡ଼ିଶା ଆଡ଼କୁ ଏହାର ଗତିପଥ ରହିବା ସମ୍ଭାବନା କମ୍‌ । ମାତ୍ର ଏତେ ଆଗରୁ ନିର୍ଦ୍ଦିଷ୍ଟ ଭାବେ କୁହାଯାଇପାରିବ ନାହିଁ । ଏପରିକି ଏହା ମିଆଁମାର ଉପକୂଳ ଆଡ଼କୁ ମୁହାଁଇବା ସମ୍ଭାବନାକୁ ଏଡ଼ାଇ ଦିଆଯାଇନପାରେ ।
ବର୍ତ୍ତମାନ ସ୍ଥିତିରେ ପାଣିପାଗ ବିଭାଗ ଆକଳନ କରିଛି, ଶୁକ୍ରବାର ଓ ଶନିବାର ରାଜ୍ୟରେ ବଡ଼ ବର୍ଷା ସମ୍ଭାବନା ନାହିଁ । କେବଳ ଦକ୍ଷିଣ ଓଡ଼ିଶାର ଅଳ୍ପ କେତେକ ଜାଗାରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ । ୮ ତାରିଖରେ ଦୀପାବଳି ପର୍ବରେ ରାଜ୍ୟରେ ପାଗ ମୁଖ୍ୟତଃ ଶୁଖିଲା ରହିବ । ଆସନ୍ତା ୩ ଦିନ ଭିତରେ ରାତି ତାପମାତ୍ରା ୨ରୁ ୪ ଡିଗ୍ରୀ କମିପାରେ ।
ପାଣିପାଗ ବିଶେଷଜ୍ଞ ବିଶ୍ୱଜିତ ସାହୁ କହିଛନ୍ତି, ସମ୍ଭାବ୍ୟ ଲଘୁଚାପ ବା ଅବପାତ ନେଇ ଏବେଠାରୁ ସ୍ପଷ୍ଟ ଆକଳନ କରିବା ସହଜ ନୁହେଁ । ବର୍ତ୍ତମାନ ରାଜ୍ୟରେ ପାଗ ପ୍ରାୟତଃ ଶୁଖିଲା ରହିବ । ୭ ତାରିଖରୁ ରାଜ୍ୟରେ ହାଲୁକା ଥଣ୍ଡା ଅନୁଭୂତ ହୋଇପାରେ । ବିଶେଷ କରି ଆଭ୍ୟନ୍ତରୀଣ ଓଡ଼ିଶାର ପାହାଡ଼ିଆ ଅଞ୍ଚଳରେ ରାତି ତାପମାତ୍ରା ୧୫ ଡିଗ୍ରୀ ସେଲସିୟସରୁ ଖସିପାରେ । କନ୍ଧମାଳ, ଗଜପତି, କୋରାପୁଟ, ମୟୂରଭଞ୍ଜ, କେନ୍ଦୁଝରରେ ହାଲୁକା ଥଣ୍ଡା ଅନୁଭୂତ ହୋଇପାରେ । ଅନ୍ୟପଟେ ଉପକୂଳ ଅଞ୍ଚଳରେ ରାତି ତାପମାତ୍ରା ୧୫ରୁ ୨୦ ଡିଗ୍ରୀ ସେଲସିୟସ୍‌ ଭିତରେ ରହିପାରେ ।