Garvita Odia
ପାଟନା: ପ୍ରସିଦ୍ଧ ଶିକ୍ଷକ ତଥା ୟୁଟ୍ୟୁବର୍ ‘ଖାନ୍ ସାର୍’ (ଫୈସଲ ଖାନ୍)ଙ୍କ ବିରୋଧରେ ପାଟନା ପୁଲିସ ଏକ ମାମଲା ରୁଜୁ କରିଛି। ଖାନ୍ ସାର୍ଙ୍କ କୋଚିଂ ସେଣ୍ଟର ସମ୍ମୁଖରେ ହୋଇଥିବା ଗୁଳିଚାଳନା ଓ ଭଙ୍ଗାରୁଜା ଘଟଣାକୁ ନେଇ ଏକ ଭିଡିଓ ଭାଇରାଲ ହେବା ପରେ ପାଟନାର ଏକ ଥାନାରେ ଖାନ୍ ଗ୍ଲୋବାଲ ଷ୍ଟଡିଜ୍ର ମୁଖ୍ୟ ‘ଖାନ୍ ସାର୍’ ଏବଂ ତାଙ୍କର ଦୁଇଜଣ ସୁରକ୍ଷାକର୍ମୀଙ୍କ ବିରୋଧରେ ଆର୍ମସ ଆକ୍ଟ ଏବଂ ଭାରତୀୟ ନ୍ୟାୟ ସଂହିତା (ବିଏନଏସ୍)ର ବିଭିନ୍ନ ଧାରା ଅଧୀନରେ ମାମଲା ରୁଜୁ କରାଯାଇଛି। ଭିଡିଓରେ କୋଚିଂ ସେଣ୍ଟରର ଦୁଇଜଣ ସୁରକ୍ଷାକର୍ମୀ ଫାଙ୍କା ଗୁଳିଚାଳନା କରୁଥିବାର ଦେଖାଯାଇଥିଲା। ପୁଲିସ ଦ୍ୱାରା ଗିରଫ ହୋଇଥିବା ଦୁଇଜଣ ଘରୋଇ ସୁରକ୍ଷାକର୍ମୀ (ପ୍ରଦୀପ କୁମାର ଓ ତାଲେବର ସିଂହ) ପଚରାଉଚରା ବେଳେ ସେମାନେ ‘ଖାନ୍ ସାର୍’ଙ୍କ ନିର୍ଦେଶରେ ହିଁ ଗୁଳି ଚଳାଇଥିଲେ ବୋଲି କହିଥିଲେ। ସେମାନଙ୍କ କହିବା ଅନୁଯାୟୀ, ଖାନ୍ ସାର୍ କହିଥିଲେ ‘ତୁମେମାନେ ଗୁଳି ଚଳାଅ, ବାକି ସବୁ ମୁଁ ଦେଖିନେବି।’
ଏହି ମାମଲାରେ ଗିରଫଦାରୀରୁ ବର୍ତ୍ତିବା ପାଇଁ ଖାନ୍ ସାର୍ ଶନିବାର ପାଟନାର ଏକ ଅଦାଲତରେ ଆଗୁଆ ଜାମିନ ଆବେଦନ କରିଥିବା ଜଣାପଡ଼ିଛି। ଖାନ୍ ସାର୍ଙ୍କ ତରଫରୁ ଆଗୁଆ ଜାମିନ ଆବେଦନ କରିଥିବା ଓକିଲଙ୍କ କହିବାନୁଯାୟୀ ପ୍ରତିପକ୍ଷ କୋଚିଂ ସେଣ୍ଟରର ନିର୍ଦେଶକ ଖାନ୍ ସାର୍ଙ୍କୁ ମିଥ୍ୟା ମାମଲାରେ ଫସାଇବାକୁ ଏହି ଷଡ଼ଯନ୍ତ୍ର କରିଛନ୍ତି। ସୂଚନାଥାଉକି ଗତ ମଙ୍ଗଳବାର ରାତିରେ ୧୫ ରୁ ୨୦ ଜଣ ଲୋକ ଖାନ୍ ସାର୍ଙ୍କ କୋଚିଂ ସେଣ୍ଟର ଅଫିସ୍ ଭିତରେ ପଶି ଭଙ୍ଗାରୁଜା କରିବା ସହ ସୁରକ୍ଷାକର୍ମୀଙ୍କୁ ମାରପିଟ୍ କରିଥିଲେ। ପୁଲିସ ପହଞ୍ଚିବା ପୂର୍ବରୁ ଆତ୍ମରକ୍ଷା ପାଇଁ ସୁରକ୍ଷାକର୍ମୀମାନେ ଲାଇସେନ୍ସପ୍ରାପ୍ତ ବନ୍ଧୁକରୁ ଫାଙ୍କା ଗୁଳି ଚଳାଇଥିଲେ।
