କମିପାରେ ପେଟ୍ରୋଲ, ଡିଜେଲ ଦର

ଭୁବନେଶ୍ୱର : ଆମେରିକା ଓ ଇରାନ୍ ମଧ୍ୟରେ ଶାନ୍ତି ଚୁକ୍ତି ସହ ହର୍ମୁଜ୍ ପ୍ରଣାଳୀ କଟକଣାମୁକ୍ତ ହେବ ବୋଲି କୁହାଯାଇଛି। ଫଳରେ ଆଗାମୀ ଦିନରେ ତୈଳ ପରିବହନ ସ୍ବାଭାବିକ ହେବା ସହ ପେଟ୍ରୋଲ ଓ ଡିଜେଲ ଦର ଲିଟର ପିଛା ୮ ଟଙ୍କା ପର୍ଯ୍ୟନ୍ତ ହ୍ରାସ ପାଇବାର ସମ୍ଭାବନା ରହିଛି। କେନ୍ଦ୍ର ସରକାର ଓ ରାଷ୍ଟ୍ରାୟତ୍ତ ତୈଳ କମ୍ପାନୀଗୁଡ଼ିକର ନିଷ୍ପତ୍ତିକୁ ଅପେକ୍ଷା ରହିଛି।

ସୋମବାର ଅଶୋଧିତ ତୈଳ ଦର ଇଣ୍ଡିଆନ ବାସ୍କେଟ୍‌ ପିଛା ୮୫ ଡଲାରକୁ ଖସି ଆସିଛି। ଆଗାମୀ ଦିନରେ ଆହୁରି ଅଶୋଧିତ ତୈଳ ଦର ଖସିବାର ସମ୍ଭାବନା ରହିଛି। ମଧ୍ୟପ୍ରାଚ୍ୟ ଯୁଦ୍ଧ ଯୋଗୁଁ ହର୍ମୁଜ୍ ପ୍ରଣାଳୀରେ ଅଶୋଧିତ ତୈଳ ବୋଝେଇ ଜାହାଜ ଆସିପାରୁ ନଥିଲା। ରାଷ୍ଟ୍ରାୟତ୍ତ ତୈଳ କମ୍ପାନୀଗୁଡ଼ିକ କ୍ଷତି ଭରଣା ନିମନ୍ତେ ମେ’ ୧୫ରୁ ୨୫ ମଧ୍ୟରେ ୪ ଥରରେ ପେଟ୍ରୋଲ ଓ ଡିଜେଲ ଲିଟର ପିଛା ଦର ୮ଟଙ୍କା ପର୍ଯ୍ୟନ୍ତ ବୃଦ୍ଧି କରିଥିଲେ। ପୁଣି ରାଷ୍ଟ୍ରାୟତ୍ତ ତୈଳ କମ୍ପାନୀଗୁଡ଼ିକର କ୍ଷତି ଭରଣା କରିବାକୁ ଯାଇ କେନ୍ଦ୍ର ସରକାର ତୈଳ ଉପରୁ ୧୦ ଟଙ୍କା ଉତ୍ପାଦ ଶୁଳ୍କ ହ୍ରାସ କରିଥିଲେ। କିନ୍ତୁ ଏହାର ଲାଭ ଗ୍ରାହକ ପାଇନଥିଲେ। ଅପରପକ୍ଷେ ରାଷ୍ଟ୍ରାୟତ୍ତ ତୈଳ କମ୍ପାନୀଗୁଡ଼ିକ ପେଟ୍ରୋଲ ଓ ଡିଜେଲ ଯୋଗାଣ ହ୍ରାସ କରିଥିଲେ, ଫଳରେ ପେଟ୍ରୋଲ ଟାଙ୍କିଗୁଡ଼ିକରେ ଗ୍ରାହକଙ୍କ ଲମ୍ବା ଧାଡ଼ି ଲାଗିଥିଲା।

ଏନେଇ ଉତ୍କଳ ପେଟ୍ରୋଲିୟମ୍ ସଂଘର ସାଧାରଣ ସମ୍ପାଦକ ସଞ୍ଜୟ ଲାଠ କହିଛନ୍ତି, ଆଗକୁ ଅଶୋଧିତ ତୈଳ ଦର ଆହୁରି କମିବାର ସମ୍ଭାବନା ରହିଛି। ଯେତେବେଳେ ଅଶୋଧିତ ତୈଳ ଦର ଇଣ୍ଡିଆନ ବାସ୍କେଟ୍‌ ପିଛା ୭୫ ଡଲାରକୁ ଖସିବ, ସେତେବେଳେ କେନ୍ଦ୍ର ସରକାର ଓ ରାଷ୍ଟ୍ରାୟତ୍ତ ତୈଳ କମ୍ପାନୀଗୁଡ଼ିକ ତୈଳ ଦର କମାଇବା ଉପରେ ନିଷ୍ପତ୍ତି ନେଇପାରନ୍ତି। ନଚେତ କେନ୍ଦ୍ର ସରକାର ଦରଦାମ ହ୍ରାସ କରିବା ନିମନ୍ତେ ଆଗୁଆ ପେଟ୍ରୋଲ ଓ ଡିଜେଲ ଦର କମାଇ ପାରନ୍ତି।