ହାତୀ ଆକ୍ରମଣରେ ଯୁବକ ମୃତ

କେନ୍ଦୁଝର : କେନ୍ଦୁଝର ଜିଲ୍ଲା ବାଂଶପାଳ ବ୍ଲକ ଭୂୟାଁ ଜୁଆଙ୍ଗ ପିଢ଼ ରେଞ୍ଜ ଧାନଗଦି ଗାଁରେ ଆଜି ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଗତକାଲି ବିଳମ୍ବିତ ରାତିରେ ହାତୀ ଦାଉରୁ ଫସଲକୁ ବଞ୍ଚାଇବାକୁ ଯାଇ ଥିବାବେଳେ ଶୁଣ୍ଢରେ କଚାଡ଼ି ମାରିଲା ହାତୀ। ଘଟଣାସ୍ଥଳରେ ଯୁବକ ମୃତ । ମୃତକ ଧାନଗଦି ଗ୍ରାମର ଶିବ ମୁଣ୍ଡା(୨୩) ବୋଲି ଜଣାପଡ଼ିଛି । ଗଛରେ ଚଢ଼ି ଯିବାରୁ ହାତୀ ଆକ୍ରମଣରୁ ଅଳ୍ପକେ ବର୍ତ୍ତି ଯାଇଥିଲେ ସାଙ୍ଗରେ ଥିବା ଅନ୍ୟ ୨ ଯୁବକ।ସୂଚନା ଅନୁସାରେ, ବିଜେପି ରେଞ୍ଜର ଧାନଗଦି, ଅଡ଼ାଳ, ଯାତ୍ରା, ସୁକଡୋଳା ଆଦି ଅଞ୍ଚଳରେ ୨୪ଟିକିଆ ହାତୀ ପଲ କିଛି ଦିନ ଧରି ଉପଦ୍ରବ ଚଳାଇଛନ୍ତି। ଧାନ ଫସଲ ନଷ୍ଟ କରିବା ସହ ବହୁ ଧନ ଜୀବନ ନଷ୍ଟ କରୁଛନ୍ତି। ହାତୀ ପଲଙ୍କ ଭିତରୁ ଥିବା ୨ଟି ଦନ୍ତା ହାତୀ ହିଂସ୍ର ହେବା ସହ ଲୋକଙ୍କୁ ଘୋଉଡ଼ାଇବା ସହ ଆକ୍ରମଣ କରୁଛନ୍ତି। ଗତକାଲି ବିଳମ୍ବିତ ରାତିରେ ଧାନଗଦି ଗାଁ ନିକଟରେ କ୍ଷେତରେ ପଶି ହାତୀପଲ ନଷ୍ଟ କରୁଥିବାବେଳେ ଗ୍ରାମବାସୀ ହାତୀପଲଙ୍କୁ ଘୋଉଡ଼ାଉଥିଲେ ।
ଏହି ସମୟରେ ଶିବଙ୍କୁ ଦନ୍ତା ହାତୀଟି ଶୁଣ୍ଢରେ କଚାଡ଼ି ଦେବା ସହ ହିଡ଼ ଉପରୁ ଟେକି ନେଇ ନଦୀକୁ ଫିଙ୍ଗି ଦେଇଥିଲା । ଫଳରେ ଘଟଣାସ୍ଥଳରେ ହିଁ ଶିବଙ୍କ ମୃତ୍ୟୁ ଘଟିଥିଲା । ତେବେ ସାଙ୍ଗରେ ଥିବା ଅନ୍ୟ ୨ଯୁବକ ସନ୍ତୋଷ ମୁଣ୍ଡା ଜୀବନ ବଞ୍ଚାଇବାକୁ ଗଛ ଉପରେ ଚଢ଼ି ଯାଇଥିଲେ ଓ ରତ୍ନା ମୁଣ୍ଡା ଏକ ଖାଲରେ ପଶି ଯିବାରୁ ଦନ୍ତା ଆକ୍ରମଣରୁ ଅଳ୍ପକେ ବର୍ତ୍ତି ଯାଇଥିଲେ। ବନ ବିଭାଗ ଟିମ୍ ଓ ନୟାକୋଟ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ତଦନ୍ତ ଚଳାଇଛନ୍ତି। ତେବେ ବନ ବିଭାଗ ହାତୀପଲଙ୍କୁ ଘୋଉଡ଼ାଇବାକୁ ଚେଷ୍ଟା କରୁଥିଲେ ହେଁ ବିଫଳ ହେଉଛି। କ୍ଷେତରେ ପଶି ହାତୀପଲ ଫସଲ ନଷ୍ଟ କରିବା ସହ ବହୁ ଧନ ଜୀବନ ନଷ୍ଟ ହେଉଛି । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଲୋକେ ଅସନ୍ତୋଷ ପ୍ରକାଶ କରୁଛନ୍ତି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଲାଗି ରହିଛି । ମୃତକଙ୍କ ପରିବାରକୁ ସରକାରୀ ସହାୟତା ଯୋଗାଇଦେବା ସହ ହାତୀଙ୍କୁ ନିୟମିତ ଘୋଉଡ଼ାଇବା ପାଇଁ ବନ ବିଭାଗ ପକ୍ଷରୁ ପଦକ୍ଷେପ ନେବାକୁ ଲୋକେ ଦାବି କରିଛନ୍ତି।