Garvita Odia
ନୂଆଦିଲ୍ଲୀ: ରବିବାର ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ଏକ ବଡ଼ ବିମାନ ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଛି ସ୍ବିସ୍ ଏୟାର ବିମାନ। ସ୍ୱିସ୍ ଇଣ୍ଟରନ୍ୟାସନାଲ୍ ଏୟାର ଲାଇନ୍ସ (SWISS) ବିମାନ LX147 ର ଉଡ଼ାଣ ସମୟରେ ଏକ ଯାନ୍ତ୍ରିକ ତ୍ରୁଟି ଦେଖାଦେଇଥିଲା, ଯାହା ଫଳରେ ଇଞ୍ଜିନରେ ନିଆଁ ଲାଗିଯାଇଥିଲା। କିନ୍ତୁ, ପାଇଲଟ୍ଙ୍କ ସମୟୋଚିତ ସଚେତନତା ଯୋଗୁଁ ଉଡ଼ାଣ ବାତିଲ କରାଯାଇଥିଲା, ଯାହା ଫଳରେ ଶହ ଶହ ଯାତ୍ରୀଙ୍କ ଜୀବନ ରକ୍ଷା ହୋଇଥିଲା।ରିପୋର୍ଟ ଅନୁସାରେ, ସ୍ୱିସ୍ ଇଣ୍ଟରନ୍ୟାସନାଲ୍ ଏୟାର ଲାଇନ୍ସର ବିମାନ LX147, ଯାହାକି ଦିଲ୍ଲୀରୁ ଜୁରିଚ୍ ଅଭିମୁଖେ ଯାତ୍ରା କରିବାର ଥିଲା। ରନୱେରେ ପାଇଲଟ ବିମାନ ଉଡ଼ାଣ ଆରମ୍ଭ କରୁଥିଲେ। ସେହି ସମୟରେ, ବିମାନର ଗୋଟିଏ ଇଞ୍ଜିନରେ ଏକ ଯାନ୍ତ୍ରିକ ତ୍ରୁଟି ଦେଖାଦେଲା ଏବଂ ଏଥିରେ ନିଆଁ ଲାଗିଗଲା। ପରିସ୍ଥିତିର ଗମ୍ଭୀରତାକୁ ବୁଝି ପାଇ ପାଇଲଟ୍ ତୁରନ୍ତ ଉଡ଼ାଣ ବାତିଲ କରିଥିଲେ।
ଏହି ଘଟଣାରେ ଛଅ ଜଣ ଯାତ୍ରୀ ଆହତ ହୋଇଥିବା ସୂଚନା ମିଳିଛି ଏବଂ ସେମାନଙ୍କୁ ଚିକିତ୍ସା ପାଇଁ ହସ୍ପିଟାଲକୁ ନିଆଯାଇଛି। ଅଘଟଣ ପରେ, ବିମାନରେ ଥିବା ସମସ୍ତ ଯାତ୍ରୀଙ୍କୁ ଜରୁରୀକାଳୀନ ସ୍ଲାଇଡ୍ ବ୍ୟବହାର କରି ତୁରନ୍ତ ଏବଂ ସୁରକ୍ଷିତ ଭାବରେ ବାହାର କରାଯାଇଥିଲା। ଏୟାରଲାଇନ୍ସ ଅନୁଯାୟୀ, କିଛି ଯାତ୍ରୀଙ୍କୁ ସିଡ଼ି ବ୍ୟବହାର କରି ବାହାରକୁ ଅଣାଯାଇଥିଲା, କାରଣ ସେମାନେ ସ୍ଲାଇଡ୍ ବ୍ୟବହାର କରିପାରି ନଥିଲେ। ଏହି ପ୍ରକ୍ରିୟା ସମୟରେ ଏକ ବିଶୃଙ୍ଖଳିତ ପରିବେଶ ସୃଷ୍ଟି ହୋଇଥିଲା, କିନ୍ତୁ କ୍ରୁ ସଦସ୍ୟମାନେ ସଫଳତାର ସହ ପରିସ୍ଥିତିକୁ ନିୟନ୍ତ୍ରଣକୁ ଆଣିଥିଲେ। ଅଧିକାରୀମାନେ କହିଛନ୍ତି ଯେ ଏୟାରବସ୍ A330 ବିମାନ LX147 ରାତି ୧:୦୮ ମିନିଟରେ ଉଡ଼ାଣ ଆରମ୍ଭ କରିବାର ଥିଲା କିନ୍ତୁ ଏହାର ଗୋଟିଏ ଇଞ୍ଜିନ୍ ବିଫଳ ହୋଇ ନିଆଁ ଲାଗିଯିବା କାରଣରୁ ବିମାନ ଯାତ୍ରାକୁ ବାତିଲ କରାଯାଇଥିଲା। ସୌଭାଗ୍ୟବଶତଃ, ବିମାନରେ ଥିବା ସମସ୍ତ କ୍ରୁ ସଦସ୍ୟ ସୁରକ୍ଷିତ ଅଛନ୍ତି। ବିମାନଟିରେ ମୋଟ ୨୨୮ ଜଣ ଯାତ୍ରୀ ଏବଂ ଚାରି ଜଣ ପିଲା ଥିଲେ।
